Vawiin November ni 1,2025 hian nausen lungpawp pahnih sum harsatna avanga phai lam pam theilo te chu mi inphal te thilpek lo lut khawm hmangin Kolkata a zai turin kan zu thlah liam e. He thu kan buaipui lai hian Kolkata an thleng tawh a ni.

An chanchin tlângpui :

1. PC Lalrohlua, West Phaileng -

A ni hi thla 2 chauh a upa niin West Phaileng ah a pu te in hnuai luahin an khawsa a, a lungpawp a zau hle. A lungpawp bakah a chuap vei lam vein chu a ding lamah a in vuah a, a thâwk a buai nasa thin hle a ni.

A pa Pu Lalbiakmawia hi a hrisel lo hle a, a remchang apiang ah a inhlawh kual thin. A nu Pi Lalremruatkimi’n a zu kalpui a ni.

2. Joshua Lalremsanga, Luangmual -

A ni hi Luangmual Industry veng a khawsa an ni a, kum 1 leh thla 8 a upa a ni. An unau 3 zinga naupang ber a ni. A ni pawh a lungpawp a zau tawh hle a, zai vat anih loh chuan a boral mai a hlauhawm thu doctor in a sawi a ni.

A nu VL Remruatthangi’n a kalpui a, a pa Pu Lalmalsawma chu vai tawng a thiam avangin kan kal tel tir bawk a ni.

Lalpan an zu in buaipuina ah kaihruai tlat sela, dam leh tluang taka lo haw leh thuai turin duhsakna kan hlan e.